Kryetari i PD, Sali Berisha sulmoi nga një konferencë për shtyp kryeministrin Edi Rama për të cilin tha se e ka kapur paniku nga protesta që do të organizojë opozita më 7 korrik.
Ish kryeministri, pasi ftoi qytetarët që të jenë pjesë e protestës, akuzoi Kuvendin për aktin normativ për kompensimin e kompanive të ndërtimit që u miratua një ditë më parë.
“Tmerri i protestës e ka detyruar Edi Ramën të shpallë konferencë në një orë me ne. Por sytë e qytetarëve janë te ne. I drejtoj thirrjen në emër të frontit për shpëtimin e Shqipërisë, qytetarëve që të bashkohen më 7 korrik në orën 19:00 para Kryeministrisë në protestën më të fuqishme. Motivet e kësaj proteste janë të fuqishme. Orët e harxhuara në këtë protestë nuk do të kenë mision më të madh. Ky popull po injorohet nga regjimi i Ramës, njëlloj si në diktaturë. Akti i parlamentit tejkalonte dhe imagjinatën. Dje Rama vendosi me ligj që qindra milionë euro të fituara duke pirë gjakun e qytetarëve shqiptare me bordet shushunja, në vend që t’u rikthehen atyre që kanë problem kafshatën e gojës, që nuk blejnë dot ilaçe, atyre që po iu falimentojnë fermat, Rama i shpërndau me klientët e tij”,-tha Berisha.
