Kreu i Partisë Demokratike, Sali Berisha edhe ditën e sotme gjatë mbledhjes së grupit parlamentar të PD-së ka vijuar sulmet ndaj kryeministrit Edi Rama lidhur me projektin për ndërtimin e portit të Durrësit.
Berisha tha se Rama po e merr portin për familjen e tij, gjë që sipas kryedemokratit duhet të kundërshtohet me çdo mjet.
“Aleksandër Vuçiç i jep atij Alabarit një copë breg lumi. Dhe aty ndodh një aferë e madhe, pasi nga 4 miliardë, investohen 20 milionë. Por ky shkatërron portin. Ky e merr për familjen e tij. Kush mund të jetë tjetër që ia fsheh emrin, përveç vetes së tij? Si mund të guxojë ai, nëse nuk është vetë prapa, të fshehë emrat e aksionerëve? Ka një ligj, ndërkombëtar dhe kombëtar për transparencë, që e detyron atë të bëjë transparencë për çdo aksioner, për çdo pjesëtar të sipërmarrjes. Këta fshihen, se klani Rama është klani më mafioz i Europës. Çfarë bën ai? Ai kalon si sharës ordiner, dhe mendon se duke sharë, do i hutojë shqiptarët. Ky është një hajdut që gojën e përdor për të mbuluar vjedhjet e tij, gojë që e ka vetëm për të mbuluar vjedhjet. Por kjo nuk shkon, ky është krim, mega-krim. Krimi më i madh që ka ndodhur ndonjëherë ndaj këtij kombi. Diktatori paranojak i varrosi në bunkere, ky po i shndërron në pasuri personale. Bashkë me Olsin e tij, dhe olsat e tjerë të drogës. Hajdeni, blini apartamentet e mia, thotë ju, live, në themel. Se ua legalizoj unë paratë. Këta janë të lidhura qartazi si drita e diellit. Ndaj dhe është shumë e rëndësishme, qytetarëve t’u flasim dhe t’u shpjegojmë se çfarë po ndodh në kurriz të tyre. Porti është pasuria më e vlefshme e një vendi, nuk krahasohet me asnjë pasuri tjetër publike. Ndaj dhe ne, duhet ta kundërshtojmë me të gjitha mjetet.
