Kreu i PD, Sali Berisha ka dalë në konferencën e përjavshme për mediat, ku është ndalur te kriza energjetike.
Gjatë fjalës së tij, Berisha deklaroi se Rama kërcënoi qytetarët me ndërprerje të energjisë dhe rritjen e çmimit të saj për konsumatorët.
Më tej ai tha se edhe në vitin 2021 Shqipëria ka patur prodhim rekord energjie.
“Krye temë e sotme është kërcënimi që Edi Rama u bën qytetarëve shqiptarë me ndërprerje të energjisë elektrike dhe rritjen e çmimit të saj për konsumatorët. Sipas tij kjo do ndodhë sepse çmimi i energjisë elektrike në bursë ka arritur në 600 euro. Para se të komentoj këto deklarata të tij duhet tu sqarojë shqiptarëve se falë hyrjes në prodhim të Kaskadës së Devollit, Fanit dhe mbi 50 Hidrocentraleve të tjera Shqipëria ka prodhuar në vitin 2021 rreth 9 terravat apo 8.9 terravat energji elektrike, prodhimi i saj rekord të cilin s’e ka pasur kurrë më parë. Shqipëria jo vetëm që nuk ka pasur mungesë të energjisë elektrike por ka pasur një tepricë të mirë prej së paku 2 terravat eksport.” – tha Berisha.
