Kryetari i Partisë Demokratike, Sali Berisha ka zhvilluar pasditen e sotme një takim në qytetin e Vlorës, nga ku ka prezantur kandidatët për deputet në zgjedhjet e 11 Majit.
Në fjalën e tij, kryedemokrati i është drejtuar vlonjatëve duke u thënë se Partia Demokratike është e vetmja forcë që mund ta shpëtojë vendin nga e ‘keqja që i ka rënë’.
Berisha nuk la pa përmendur edhe kalvarin e vuajtjes së kësaj force politike, deri në ditët e sotme ku ata janë të bashkuar dhe pretendentë për fitore.
Pjesë nga fjala e Berishës:
“Demokratë dhe demokrate të Vlorës, PD është partia që u përpoqën ta shuanin nga faqja e dheut sepse qëndroi shqiptare, qëndroi partia e idealeve.
Pak muaj më parë menduan se i lanë duart me ne, por ja ku jemi sot të ngritur si feniksi, të pamposhtur, të sigurt në fitore. Ne jemi burrat dhe gratë që besojmë se i bëjmë të pamundurat të mundura dhe se Shqipërinë do e shpëtojmë nga e keqja që i ka rënë.”
