Kreu i PD, Sali Berisha ka prezantuar në një konferencë për mediat Alfred Lelën si Drejtor të Zyrës së Shtypit dhe Komunikimit të PD.
Gjatë prezantimit Berisha, tha se Lela ka një karrierë të gjatë në fushën e gazetarisë.
“Kam kënaqësi të paraqes para jush drejtorin e zyrës së shtypit dhe komunikimit në PD, publicistin, gazetarin e mirënjohur, Alfred Lela. Alfredi ka një karrierë të suksesshme në fushën e gazetarisë. Pas përfundimit të studimeve ka bërë një vit kualifikimi në Masachusets University, ka kompletuar doktoraturën me një libër, më interesantin e jetës së tij. Do të drejtojë këtë sector jashtëzakonisht të rëndësishëm për partinë dhe për publikun me qëllimet më të mira për të vendosur standardet më të mira të transparencës, etikës së PD-së”, u shpreh Berisha.
Prezantimi nuk ka kaluar pa batuta, pasi menjëherë sapo Berisha e prezantoi, Lela kërkoi të thoshte disa fjalë, por mikrofoni duket se nuk arrinte deri te vendi i Lelës.
Berisha pas kësaj situate tha:“Të marrësh që në fillim mikrofonin tim nuk është mirë”, teksa Lela mori më pas mikrofonin e njërit prej gazetarëve pranë. Kjo batutë shkaktoi të qeshura në sallë.
