Kreu i Partisë Demokratike, Sali Berisha mbajti mesditën e sotme konferencën për mediat në selinë blu.
Kryedemokrati Berisha fillimisht u shpreh se ‘farsa elektorale’ që Partia Demokratike denoncon, ka bërë jehonë në Këshillin Evropian, e është një temë kryesore për grupet parlamentare dhe komisionet e unionit.
“Farsa nuk kapërdihet. Ka tre ditë në asamblenë parlamentare të KiE, farsa elektorale është çështje kryesore. Në seanca plenare e në mbledhje të grupeve parlamentare e komisioneve”, tha ai.
Ndërkohë kryedemokrati denoncon se përveç metodës “treni bullgar”, është përdorur dhe ajo e mbushjes dhe zëvendësimit së kutive të votimit.
“Këto qendra votimi këtu, e shumë e shumë të tjera, ngjallin dyshime shumë të forta se përveç trenit bullgar, është përdorur dhe zëvendësimi, mbushja dhe zëvendësimi i kutive të votimit. Mbushja dhe zëvendësimi i kutive të votimit me kuti të tjera”, tha ai.
Berisha jep dhe shembull për të përforcuar këtë akuzë
“QV 2247, janë konstatuar tre fletë votimi që janë konsideruar të pavlefshme, ndërkohë që ishin të vlefshme. Janë gjetur në kutinë e votimit 9 fletë më shumë, nga ajo që deklarohet në procesverbalin 08. Këto fletë votimi më shumë seç deklarohen, nuk kanë të bëjnë me atë qendër votimi. Sikundër, kjo ngjall dyshime të forta se ajo kuti është e mbushur dhe ka zëvendësuar kutinë e qendrës. Në asnjë lloj rrethane, nuk mundet që të dilnin 9 fletë votimi më shumë nga ç’duhet të ishin”, tha Berisha.
