Kandidati i PD-së së Alibeajt për bashkinë e Tiranës, Roland Bejko thotë kjo forcë politike mund të dalë fituese dhe në bashki të tjera më 14 maj.
Edhe Alibeaj gjeti vetëm 14 emra për të përfaqësuar PD që mban ligjërisht vulën, Bejko thotë se vëmendja tek ata ka ardhur duke u shtuar pasi sipas tij, qytetarët kanë kuptuar se përballë kanë njerëz të vërtetë.
Më tej, Bejko thotë se luftën e ka me Veliajn, ndërsa betejën me Berishën.
“Nuk kam bërë llogaritje, ka disa bashki ku janë shanset. Shans kemi edhe në Tiranë pasi fakti që mbi 70 për qind e urren këtë oligarki politike e përbërë nga treshja Rama-Berisha-Meta, të cilët e duan shumë njëri-tjetrin, me ata të dy Rama qëndron në pushtet sa të dojë vetë. Vëmendja tek ne ka ardhur duke u shtuar se qytetarët e kanë kuptuar se përballë kanë njerëz të vërtetë. Luftën e kam me Erion Veliajn, betejën e kam me Sali Berishën. Po fituam Tiranën, do i bëjmë presion qeverisë që të ndryshojë ligjin për referendumet”, shprehet Bejko.
Bejko ka ftuar dhe demokratët që drejtohen nga Sali Berisha që të bëhen pjesë e hapjes së fushatës. Në një intervistë për Klan Neës, Bejko akuzon kreun e PD-së, Sali Berisha pasi sipas tij, i ndau demokratët teksa pretendon se hallin e tij personal e futi brenda PD-së.
“Do të jetë një çelje fushate në sallën e Sportit “Fahrije Hoti” që ndodhet pranë Kishës Katolike aty dhe aty do të jetë të ftuar struktura të PD-së, anëtarë dhe simpatizantë të PD-së dhe qytetarë tjetër të lirë e madje ftojmë edhe ato të foltores, demokratë kanë qenë që kanë shkuar pas Berishës, janë të mirëseardhur që të vijnë të dëgjojnë dhe pastaj të vendosin. Ne bashkë ishim, na ndau Berisha, hallin e tij personal e futi brenda PD-së. Berisha është e shkuara. Berisha do të mbahet mend si njeriu që tradhtoi demokratët që i çoi tek Partia e Ilir Metës. Në fund fare, Meta do të marrë këto vota dhe në një moment të duhur, do të kalojë tek Veliaj sot dhe nesër tek Rama. Berisha në këtë rast është i pabesë me demokratët dhe i manipulon ata me shpresën se do të fitojë ai. E di që nuk do të fitojë kurrë sepse nuk ka asnjëlloj narrative sepse janë 90 për qind e shqiptarëve që e akuzojnë. Berisha ushtroi dhunë me atë hiperbolizimin e tij dhe në fund fare asgjë nga këto nuk ndodhi dhe Meta po bën parti në kurriz të demokratëve. Demokratët do ta kuptojnë herët a vonë se vendi i tyre tek PD-ja. Busulla që ju jep Berisha është e gabuar,-tha Bejko./ Opinion.al
