Kreu i Partisë Demokratike, Sali Berisha ka sulmuar sot kryetarin e Bashkisë së Himarës, Vangjel Tavon, në një takim të zhvilluar në këtë qytet për prezantimin e kandidatëve.
Gjatë fjalës së tij, Berisha tha se Tavo erdhi në Himarë si misionar i qëllimeve mafioze të Edi Ramës për të plaçkitur tokat e Gjipesë.
Më tej, ai është zotuar para qytetarëve se qeveria e ardhshme do të sigurojë paprekshmërinë e pronës, kompensimin e saj dhe pajisjen me dokumente.
“Zotohem para jush se qeveria e ardhshme, paprekshmërinë e pronës, kompensimin e saj, pajisjen me dokumente, legalizimet do t’i ketë përparësi absolute. Sot në Shqipëri ka ligje të cilat janë një kopje e ligjeve të ’46. Edi Rama ka krijuar një agjenci që ka vendosur si pronë të gjithë territorin e shtetit shqiptar. Ka vendosur aty një lubi, si Lubi Balluku, që ka autoritetin të bëjë çdo gjë me pronat e shqiptarëve.
Ne zotohemi që do respektojmë paprekshmërinë e pronave, i them Vangjel Tavos, se e meriton plotësisht neverinë tuaj. Erdhi si misionar i qëllimeve mafioze të Edi Ramës, i cili me familjen e tij do të plaçkisë tokat e Gjipesë, në një kohë kur familja e tij sipas dëshmive ka patur 4 dhi dhe 3 derra. Edi Rama s’do ta gëzosh kurrë atë tokë, është e këtyre banorëve, e Manastirit”, tha Berisha.
