Kreu i Partisë Demokratike, Sali Berisha, ka folur sërish sot për fushatën elektorale të PS-së.
Në takimin e tij me personat me aftësi të veçanta, Berisha tha se kryeministri Edi Rama bën gallatë me qytetarët sikur ata mos të kishin asnjë problem.
Sipas tij, shqiptarët duan të ndërtojnë jetën në Shqipëri, për këtë arsye Berisha garanton se do zbatojë programin e tij pikë për pikë.
”Kurrë mos të harrojmë, ne kemi projektin e Shqipërisë Madhështore, por Mahatma Gandi e ka lënë të pavdekshme thënien se madhështia e një kombi provohet në qëndrimin që mban ndaj anëtarëve të tij në nevojë.
Jemi në një fushatë elektorale, natyrisht normale që në këtë fushatë forcat politike të hartojnë programin dhe të paraqesim programin dhe ne jemi mirënjohës për të gjitha diskutimet që bëmë.
Shikoni çfarë bën. Çdo ditë në një përqeshje me qytetarët shqiptarë, sikur ata nuk kanë hallë, merret me zhapinj, më kënetën, merret me bufin, merret me Lulin, fut dhe Bravën në valle, hajde të bëjmë pak gallatë se kështu duan shqiptarët.
Jo mor zotëri, nuk duan gallatë shqiptarët. Shqiptarët kanë halle shumë. Shqiptarët duan të ndërtojnë jetën në Shqipëri, duan të jetojnë si njerëz në këtë vend, duan të kenë gjërat bazë të siguruara, duan që fëmijët e tyre të ndërtojnë ëndrrat në Shqipëri. Dhe unë u siguroj se ky program ka qëllimin kryesor dhe u garantoj se do zbatohet pikë për pikë”, tha Berisha.
