Ish-kryeministri Sali Berisha deklaroi sot se Partia Demokratike do të depozitojë në Parlament ligjin për dyfishimin e rrogave.
Në një deklaratë për mediat nga selia blu, Berisha tha se garanton qytetarët se jo dyfishimi i rrogave, por mbidyfishimi i tyre do jetë objektiv numër një i qeverisjes së PD.
Sakaq, lidhur me vendimin e qeverisë Rama për rritjen e pagës minimale në muajin prill, Berisha tha se rritjet e pagave në asnjë vend të lirë nuk bëhen para zgjedhjeve.
“Jam sot para jush për t’u bërë thirrje të gjithë punonjësve të administratës, të mos bëhen pjesë e mega-krimit elektoral të përdorimit të Aktivistit për qëllime të mbështetjes së pushtetit të krimit. Aktivist është një aplikacion i dënueshëm në ligjin kombëtar dhe ndërkombëtar.
Dëshmi e shndërrimit të narkoshtetit të Ramës në një narkoshtet elektoral, shndërrimit në një makineri të dhunimit masiv të votës përmes ndikimeve të paligjshme.
Mjet terrori mbi zgjedhësit shqiptarë.
Duke denoncuar, njoftoj gjithashtu se PD do ndërmarrë të gjitha hapat ligjore ndaj këtij instrumenti terrori si brenda vendit ashtu dhe në institucionet pranë rrjeteve sociale nëpërmjet të cilave përdoret ky aplikacion antiligjor.
PD denoncon të turpshme, antiligjore përdorimin e qindra milionë eurove për qëllime elektorale nga Rama.
Garantoj qytetarët se jo dyfishimi i rrogave, por mbidyfishimi i tyre do jetë objektiv numër një i qeverisjes së PD.
Rritjet e rrogave në asnjë vend të lirë nuk bëhen kurrë para zgjedhjeve, para votimit të qytetarëve.
Ai që bën një akt të tillë është një kriminel elektoral, bandit, mashtrues ordiner.
Pagat e ulëta duhet të dyfishohen, ne i garantojmë të gjithë punonjësit se pagat në gjithë sistemin e piramidës së administratës shtetërore do të dyfishohen.
Por këto akte nuk ndërmerren kurrë para zgjedhjeve me qëllim për të ndikuar votën e qytetarëve.
Thirrja e tij për rritjen e rrogave të ulëta është një demagogji, se ajo nuk bëhet me vullnet, është thirrje thjesht propagandistike.
PD do depozitojë në Parlament ligjin për dyfishimin e rrogave të ulëta si akt i parë. Dhe ky ligj i detyrushëm për çdo institucion dhe sipërmarrje”-tha Berisha.
