Sot kryetari i PD Sali Berisha do të paraqitet në SPAK, në zbatim të vendimit të Gjykatës së Posaçme të Apelit që e la nën masën “detyrim paraqitje” për dosjen “Partizani”. Ashtu si radhën e shkuar, pritet që demokratët të nisin protestën e tyre në orën 09:30 përpara ambienteve të Prokurorisë së Posaçme.
“Në ora 9:30 përsëri të gjithë në protestë përpara SKAP- it si vegël në duart e Ramës për të përndjekur kundërshtarët politikë”, thuhet në mesazhin dërguar mbështetësve të PD.
Edhe në datën 6 Janar të këtij viti, Berisha u paraqit në SPAK nën brohorimat e mbështetësve. Kryetari demokrat repektoi vendimin e Apelit “detyrim paraqitje”, ku qendroi në SPAK jo më shumë se 7 minuta. Theksoi se ky vendim do t’i shtojë votat në zgjedhjet e 11 Majit
“Vendosa të zbatoj vendimin sepse ka një proces parlamentar të pseudo-mazhorancës kundër meje, e cila autorizoi drejtësinë, unë nuk mund të them se nuk ekziston ajo, pavarësisht se ishte antikushtetues, por ishte një proces parlamentar. Kjo masë sigurie do më shtojë më shumë votat sepse u faktua kjo”, u shpreh Berisha para mediave në oborrin e SPAK.
Në paraqitjen e parë te OPGJ-ja, Berisha la edhe një shënim në fletën e detyrimit të paraqitjes.
“Ky është një akt i turpshëm politik me të cilin prokuroria në kundërshtim me Kushtetutën kërkon të më ndalohet fjala e lirë, dhe një gjykatës kukull i Partisë vendosi sipas kërkesës së tyre. Unë kam denoncuar dhe do denoncoj bashkëpunimin e Dumanit e kompani me krimin si një organizatë kriminale”, shkroi kreu i PD-së.
