Kreu i demokratëve Sali Berisha ka zhvilluar këtë të dielë një takim me shqiptarët që ndodhen në Napoli të Italisë. Dhe si në çdo takim me shqiptarët jashtë Shqipërisë Berisha tha se ky do të jetë viti i diasporës.
Ai paralajmëroi Kryeministrin Edi Rama se këto janë 50 ditët e fundit në pushtet diaspora do i jap fitoren më 11 Maj.
“Drejt 50 ditëve që kanë mbetur. Këto 50 ditë janë vendimtare për shpëtimin e Shqipërisë dhe shqiptarëve. Por, siç e dini, kam deklaruar me bindjen më të thellë se ky vit është viti i diasporës shqiptare. Kam deklaruar me bindjen më të thellë se ky është viti i diasporës, sepse njëlloj si dikur, shekuj më parë, do të jenë shqiptarët nga jashtë që do të shpëtojnë Shqipërinë. Ndaj edhe sot mund të themi si atëherë, prite Edi Rama diasporën se po vjen. Po vjen të shpëtojë mëmëdheun”, tha Berisha. Po vjen t’i dalë zot Shqipërisë. Po vjen të shpëtojë Shqipërinë nga regjimi, të cilin do ta kishte lakmi Eskobari, Toto Rina, El Çapo. Do ta kishin zili banditët dhe kriminelët më të mëdhenj të planetit. Edi Rama, me ditë të numëruara, diaspora po vjen. Diaspora po vjen sepse ti shkatërrove njëra pas tjetrës ëndrrat më të bukura, më fisnike të shqiptarëve. Shqiptarët kishin një ëndërr në diktaturën komuniste dhe ajo ishte pluralizmi. Shqiptarët vuajtën më shumë se të gjithë të tjerët nga shteti monist dhe partia shtet. Kurse ti sot bëre një luftë të egër, çnjerëzore, për një Shqipëri pa opozitë. Riktheve në Shqipëri partinë shtet.
Partinë Socialiste e faktove si kopje të shëmtuar të Partisë së Punës, e cila ishte një parti krimi. Krimi i kësaj partie bazohej në doktrinën marksiste leniniste.Kurse krimi yt bazohet në drogën, krimin, plaçkitjen e shqiptarëve. Edi Rama, prite diasporën. Diaspora po vjen se ti u shkatërrove shqiptarëve arritjet e tyre në fushën e lirisë dhe të tregut. Ti riktheve censurën njëlloj si babai yt që varte në litar poetin për vargjet e tij kundërshtare të regjimit. Ti monstër e babait tënd vare në litar TikTokun, mjetin më modern të komunikimit të rinisë shqiptare dhe e bëre atë se nuk duroje kritikat e tyre. Edi Rama, diaspora nuk pajtohet me flamurin tënd të zi të censurës. Prite se po vjen, 11 Maji është dita e saj, është fundi yt. Edi Rama, 2025-a është viti i këtyre burrave dhe grave, të cilët kanë në shpirt një dashuri të pakufishme për Shqipërinë. Të cilët kanë marrë me vete mallin e pashuar për tokën e tyre. Por ti, me botën e krimit që instalove në Shqipëri, me plaçkitjet masive të pasurive të tyre, i detyrove të marrin rrugët e botës. Edi Rama, me 11 Maj ata kanë një fjalë me ty, ik o mjeran se nuk ke ku të shkosh. Miqtë e mi, ëndrrat e shqiptarëve i rrënoi Edi Rama, po shpirti i tyre për liri, betejat e tyre, virtytet e tyre nuk vdesin kurrë. Ato janë më të fuqishme se kurrë tek shqiptarët në vendet e lira. Ndaj dhe ata me 11 Maj, nga deti, nga toka, nga ajri do vërshojnë në Shqipëri”, tha Berisha.
Gjatë fjalimit të tij Berisha tha se projekti që ka PD dhe koalicioni për Shqipërinë është një projekt aq madhështor saqë në Shqipëri nuk ka pasur ndonjëherë.
“Prite diasporën Edi Rama. Projekti i PD dhe koalicionit është projekti më madhështor, projekti më i bukur, më fantastik që Shqipëria ka pasur ndonjëherë”, tha Berisha.
