Ish-kryeministri Sali Berisha këtë të enjte ka dorëzuar mandatin e deputetit, por po ashtu mësohet se edhe Garda e Republikës i ka hequr shërbimin e ruajtjes fizike. Në një reagim për mediat, Garda thekson se sipas ligjit, zoti Berisha përfitonte shërbim ruajtje për një përiudhë 3-vjeçare pas përfundimit të detyrës.
Megjithatë duket se edhe ky sqarim i Gardës lë shumë vend për diskutim, pasi mandati i zotit Berisha ka përfunduar në vitin 2013 dhe sipas ligjit, edhe shërbimi duhej të kishte përfunduar që në vitin 2016.
“Në përgjigje të interesit të disa mediave, lidhur me truprojet e zotit Sali Berisha, Garda e Republikës informon se në zbatim të Nenit 5, të Ligjit Nr. 8869, datë 22.5.2003 “Për Gardën e Republikës së Shqipërisë” i ndryshuar, ku përcaktohet se Kryeministri i vendit përfiton shërbim ruajtje për një periudhe 3-vjeçare pas përfundimit të detyrës, është ndërprerë vijimi i mëtejshëm i këtij shërbimi”, sqaron Garda në reagimin e saj.
Vetë Berisha për këtë gjë, është shprehur: “Një gjest frikacak dhe hakmarrës i Edi Ramës por unë jam mes qytetarëve më i fortë se kudo tjetër. Do të vazhdoj çdo minutë, çdo orë, çdo javë, çdo muaj betejën deri në çmontimin e narkoshtetit në Shqipëri derisa shqiptarët të votojnë të lirë siç u takojnë”./Opinion.al
