Ish-kryeministri Sali Berisha ka reaguar në lidhje me detajet e reja të dala mbi vrasjen e të resë keniane Joy Ayoko, ngjarje e ndodhur në Gushtin e vitit 2022.
Përmes një postimi në “Facebook”, Berisha shkruan se një grup zyrtarësh në polici bënë gjithçka për të manipuluar çdo provë hetimore në mënyrë që të mbronin vrasësin e 22-vjeçares.
Ndër të tjera ai i bën thirrje qeverisë së Kenias të paraqesë rastin e qytetares së tyre pranë Komisionit të OKB për të drejtat e njeriut mbasi autoritet shqiptare, sipas Berishës po fshehin autorin e ngjarjes.
“Vrasësit e Joy Ayoko i fsheh qeveria.
Të dashur miq, një grup zyrtarësh kriminelë në polici, prokurori etj bënë gjithçka që të manipulonin çdo provë hetimore për të mbrojtur vrasësin e vërtetë të 22 vjeçares nga Kenia, Joy Ayoko. Ata vazhdojnë në këtë rrugë duke pyetur dhe ndaluar persona të ndryshëm dhe duke rrjedhur hetimet vetëm e vetëm për të fshehur vrasësin e saj sepse ai është i lidhur në qeveri.
I bëjë thirrje qeverisë së Kenias të paraqesë rastin e qytetares së tyre pranë Komisionit të OKB për të drejtat e njeriut mbasi autoritet shqiptare po fshehin kriminelin”-shkruan Berisha.
Ditën e sotme u raportua se Prokuroria e Tiranës ka identifikuar nga kamerat e sigurisë një punonjës të kazinosë ku punonte 22-vjeçarja, i cili është shtuar në listën e të dyshuarve.
Sipas informacioneve, gjatë marrjes në pyetje ai ka pranuar se e ka shoqëruar disa herë Joy Aokon në banesën ku ajo qëndronte./Opinion.al
