Ish-kryeministri, Sali Berisha ka zhvilluar sot takimin e tij elektoral me kandidatin e koalicionit “Bashkë Fitojmë” për Bashkinë Berat, Zija Ismaili.
Gjatë fjalës së tij, Berisha tha se gënjeshtrat e rilindasve nuk kanë të sosur, kështu që ai propozoi që për mashtrimet e tyre të varet një barometër në Parlament.
Sipas ish-kryeministrit, qytetarët duhet që të votojnë për veten e tyre duke marrë parasysh faktin se është duke u konstatuar se Berati dhe fshatrat e tij janë braktisur dhe se fermat e tyre nuk kanë sukses.
“Berati nuk ka ujë 24 orë, por është një gënjeshtër parlamentare. Unë kam kërkuar që të gjejmë një barometër të gënjeshtrave e ta varim aty në parlament, se ju nga mëngjesi deri në darkë në sesionet e parlamentit dëgjoni rilindasit që nxjerrin vetëm gënjeshtra ndaj jush.
Në fshatrat e Beratit, as nuk bëhet fjalë për furnizim me ujë. Fshatarët e Beratit sot janë më të braktisur se kurrë. Atëherë, iu bëj thirrje të votojnë për veten e tyre. Në qoftë se ndjehen mirë, dakord, por nëse konstatojnë se janë braktisur, se fermat e tyre nuk kanë sukses, se prodhimet e tyre nuk rrisin mirëqënien e tyre, atëherë i ftoj të votojnë ndryshimin. Ndryshimi është në duart tuaja, votoni Zija Ismailin”, tha Berisha./Opinion.al
