Ish-Kryeministri Sali Berisha gjatë prezantimit të kandidatit të koalicionit “Shtëpia e Lirisë” në zgjedhjet e pjesshme të 6 marsit, Premtim Kryemadhi, ka folur për ndërtimin e Skavicës.
Lideri historik i demokratëve ka thënë se nuk është kundër ndërtimit të hidrocentraleve, por kundër përmbytjes së fshatrave, duke iu referuar këtij projekti.
“Në Dibër vendos pa pyetur fare banorët, pa pyetur qytetarët të përmbysë pothuajse në tërësi tokat e saj pjellore, të zhvendosë fshatra të tëra, shkolla, teqe, xhami, varreza. Të varrosë histori të madhe të Dibrës pa pyetur njeri përsëri. Meqë jemi këtu dua t’ju bëj një shpjegim, ajo nuk mund të ndodhë kurrë. Që të përmbytet Dibra nuk do të ndodhë kurrë. Dua t’ju sqaroj, në vitin 2005 Fatos Nano kishte firmosur me një kompani të madhe italiane kontratën për ndërtimin e Skavicës. Erdhi kompania, i them unë nuk e pranoj këtë. E para e ke marrë pa tender dhe pa tender nuk pranoj gjë. E dyta nuk pranoj në mënyrë absolute tokat e Dibrës. Italiani ishte serioz dhe megjithëse kishte bërë kontratën me kryeministrin, e vërteta është se kishte shkuar në parlament kontrata, ke të drejtë më tha. Nuk pranoj unë të zhvendos fshatra. Ai bëri një projekt shumë të mirë pa përmbytje. Merrte Drinin në Skavicë dhe e nxirrte afër Bicaj. Ai ishte projekti. Unë nuk jam kundër ndërtimit të HEC-eve, por jam kundër përmbytjeve të fshatrave”, tha Berisha.
Më tej Berisha vijoi deklaratën duke thënë: “Ai kandidati që ka sjellë nga Tirana, ai të dalë njëherë para jush dhe të japë llogari për Skavicën dhe projektin e tij ose të kthehet nga ka ardhur”./Opinion.al
