Është e enjtja e dytë që demokratët nuk e zhvillojnë debatin në institucionin e Parlamentit. Paradite deputetët opozitarë mbajtën disa fjalime në çadrën pranë Kryeministrisë.
Sali Berisha e nisi fjalën e tij, duke theksuar rëndësinë e votës së lirë me një mesazh drejtuar veçanërisht të varfërve.
“Ju ftoj të dashur shqiptarë të mendoni për votën tuaj. Unë e di se me qindra e mijëra kur më dëgjoni këto fjalë thoni lëri keto që thua: Ne s’kemi kafshatën për të ngrënë. Dhe unë jam me ju, kafshata është më e rëndësishme se vota, kafshata është jeta. Po ju them ju të tjerëve, a ka një rrugë tjetër që këta njerëz mos numërojnë kafshatën? A ka një rrugë tjetër që ju të ndjeheni të lirë, të sigurtë, të ndjeheni me dinjitet në vendin tuaj përveç votës së lirë? Jo nuk ka. Atëherë le të luftojmë për të votuar të lirë, të luftojmë edhe për ata të cilët e vërteta është që dhimbja, lotët e mjerimit për kafshatën ja u kanë shuar tërësisht sensin dhe kuptimin e votës. Të luftojmë që dhe ata gradualisht të kuptojnë se problemin e kafshatës do ta zgjidhim vetëm duke votuar të lire”.
Berisha u përqëndrua tek inkriminimi i Kuvendit dhe niveli i kultivimit të drogës për të theksuar se pse zgjedhjet sipas tij janë më shumë se kurrë të rrezikuara.
“Vendi me drogë u mbush vetëm e vetëm për një qëllim; me qëllimin që të helmohet vota, që vota të drogohet me çdo kusht, që kanabisi të përcaktojë vullnetin e shqiptarëve. Erdhi në pushtet me 19 vrasës e trafikantë në parlament. Edi Ramën ligji e nxori lakuriq siç është, ai nuk shkëputet dot kurrë nga krimi. Ai, nën presionin e madh i imponon Ndokës dorëheqjen, ndërkohë i jep karta biankën e Partisë Socialiste për Lezhën. Ai, pasi me Denar Prengën ja mbrojti mandatin, i kërkon të dorëhiqet. Po pse? Sepse do që ta kandidojë në zgjedhjet e ardhshme. Pra, çfarë bën tjetër? Liroi Hakmarrjen për Drejtësi, klubin e strukturuar terrorist të Ballkanit.”
PD nuk arriti të fusë dhe testin e drogës në ligjin për dekriminalizimin, por ja çfarë betimi bën Sali Berisha për Parlamentin e ri:
“Do përpiqem shumë dhe do bëj gjithçka, dhe le ta mësojnë, se në parlamentin e ardhshëm nuk do ulet deputet pa bërë testin e drogës! Ta mësojë se s’ka për t’u ulur deputet në atë parlament pa bërë testin e drogës Edi Rama. 24 orë mbajti parlamentin me ligjin e dekriminalizimit dhe nuk e pranoi”.
Të enjten u mbushën 13 ditë protestë, një protestë e durimit, siç e quajti ish-kryeministri, kur tha se opozita është e vendosur të bëjë çdo sakrificë për votën e lirë.
“Herët ose vonë, ne që jemi këtu do të faktojmë ty se votën jemi të gatshëm t’a mbrojmë me çdo çmim, t’a mbrojmë me çdo kusht, të mos ja dorëzojmë kujt kurrë përveç vullnetit tonë! Fitore, fitore”!
