Ish-kryeministri Sali Berisha nuk është i pranishëm sot në seancën plenare, ai ndodhet në Azerbajxhan për të marrë pjesë në forumin e 6-të global të organizuar nga Qendra Ndërkombëtare “Nizami Ganjavi” me temë ” Rrëzimi i pengesave për krijimin e shoqërive gjithëpërfshirëse”.
Mungesa e Berishës në parlament u lidh nga mazhoranca me 10 vjetorin e Gerdecit. “Lulzim ke bërë mirë që nuk e lënë Saliun të vijë në sallë se do të ishte një provokim i madh. Në dritën e drejtësisë së re që po lind kemi shprese për drejtësi edhe për 26 jetët e humbura në Gerdec. Fajtorët të shkojnë aty ku u takon”, u shpreh në foltoren e parlamentit, kreu i grupit të PS, Taulant Balla.
Sakaq, Berisha në profilin e tij në facebook, shpërndan fjalimin që po mban në Azerbajxhan.
“Bota e sotme është një botë plot hendeqe, duke penguar krijimin e një shoqërie me të vërtetë gjithëpërfshirëse, të çliruar nga vështirësitë ekonomike, konfliktet e dhunshme, degradimi intelektual dhe moral. Në një botë që nuk është më njëpolare, por ku një numër fuqish botërore dhe rajonale po rriten fuqishëm, balancat po ndryshojnë duke ndikuar edhe në jetën e shoqërive të vendeve të tjera”, shkruan Berisha.
Sipas tij në forum marrin pjesë një numër shumë i lartë personalitetesh ndërkombëtare, përfshirë Binali Yildirim Kryeministër i Turqisë, Igor Dodon President i Moldavisë, Gjorge Ivanov President i Maqedonisë, Giorgi Kvirikashvili Kryeministër i Gjeorgjisë, Mevlut Chavushoghlu Minister i Jashtëm i Turqisë, etj. Forumi do të përshëndetet me mesazhe nga Theresa May Kryeministre e Mbretërisë së Bashkuar dhe Antonio Guterres, Sekretar i Përgjithshëm i UN.
