Duke folur në emisionin “Opinion” mbi studimin e Institutit të Studimeve Politike për deputetët që kanë folur më shumë në Parlament, tabela përmbledhëse e replikave tregoi se më shumë replika ka bërë Sali Berisha me tetë të tilla, i dyti vjen Lulzim Basha me gjashtë, Taulant Balla dhe Edi Rama me pesë, Arben Ahmetaj me katër replika.
Analisti Arian Çuri i ftuar në “Opinion” u shpreh se Sali Berisha ka më shumë replika se sa kryetari i Partisë Demokratike Lulzim Basha, e sipas tij kjo shpjegohet me karakterin më luftarak.
Por kjo gjë është kundërshtuar nga drejtuesi i Institutit të Studimeve Politike, Afrim Krasniqi i cili tha se është strategji e Partisë Socialiste. “Nëse PS dëshiron të ndryshojë rrjedhën e parlamentit, shkon te sulmi personal. Prandaj është mekanizëm që e detyron të replikojë”, u shpreh Krasniqi.
Ndërkohë, në tabelën përmbledhëse për deputetët më efikasë në Parlament, rezulton se Erion Braçe dhe Jorida Tabaku janë më efektivët. Megjithëse janë dy tipologji të ndryshme politikanësh, Afrim Krasniqi shpjegoi se janë deputetë që shfrytëzojnë më mirë mekanizmat që ofron Parlamenti.
Më tej ai tha se kur liderët janë të pranishëm në parlament, shmangia nga axhenda e diskutimeve shkon deri në 90%, ndërsa kur liderët nuk janë në sallë, shmangia nuk i kalon 50-60%./Opinion.al
