Këtë të dielë ish-kryeministri, Sali Berisha ka zhvilluar “Foltoren” e tij të parë pas zgjedhjeve të 6 Marsit, me shqiptarët që jetojnë në Greqi.
Gjatë fjalës së tij, Berisha u është drejtuar emigrantëve duke thënë se vota e tyre do të jetë përparësi e PD.
Më tej ai tha: “zgjedhjet e ardhshme do të votoni nga aty ku jeni për kandidatët që doni”.
“Do të bëjmë gjithçka për një bashkëpunim sa më të ngushtë të degëve tona në Athinë dhe kudo që ndodhen, inkurajojmë nxitjen e tyre. Një bashkëpunim sa më të ngushtë me të gjithë emigrantët shqiptarë kudo që janë që ato të kenë rolin e tyre direkt në të gjitha zhvillimet e vendit. Vota e emigrantëve, ushrimi i të drejtës së tyre, do të jetë përparësi e Partisë Demokratike. Ju garantojmë që kjo do të jetë përparësi absolute ne zgjedhjet e ardhshme. Ju do të votoni aty ku jeni për kandidatët që doni. Një kuadër i ri ligjor do të hartohet për tërheqjen e investimeve nga emigracioni dhe diaspora jonë. Investimi i tyre përbën një potencial të jashtëzakonshëm për shpejtimin e rritjes ekonomike të Shqipërisë. Ju garantoj se në çështjet e bashkëpunimit me emigracionin shqiptar, angazhimi i tij do të jetë një përparësi kryesore e PD në pushtet”, tha Berisha.
