Ish-Kryemnistri Sali Berisha ka folur për mediat lidhur me dorëheqjen e Ministrit të Transporteve Edmond Haxhinasto, teksa në të njejtën kohë ka paralajmëruar se shumë shpejt Edi Rama nuk do të jetë më Kryeministër.
Sipas Berishës, Rama nuk mbulon dot me largimin e Haxhinastos, vjedhjet e tmerrshme të tij në fushën e infrastrukturës dhe tani ai thjesht kërkon “të lajë duart” me dështimin.
“Pasi ka shpenzuar 210 miliardë lekë për investime, nuk është në gjendje tu tregojë shqiptarëve qoftë dhe një segment, qoftë dhe një km rrugë të ndërtuar në tre vjet. Ndërkohë ju kujtoj se në 2.1 miliardë dollar janë ndërtuar gjatë viteve të mëparshme, Rruga e kombit, tuneli i Kërrabës, autostrada Lushnje-Fier, Levan-Vlorë dhe Levan-Tepelenë. Nuk e mbulon dot me largimin e Haxhinastos vjedhjen e tmerrshme Rama. Me 2.1 miliardë të Edi Ramës pëllcitën xhepat e Edit dhe Olsit”.
Shembull të interesave korruptive të Ramës, Berisha ka marrë projektin e “Rrugës së Arbrit”, që sipas tij nuk do të realizohet kurrë me Ramën Kryeministër.
“Rruga e Arbrit u ndërtua në 32 km nga qeveria e mëparshme, përfshi një nga segmentet më të vështira të saj. Mbeti pa ndërtuar për arsye strikte teknike sepse tuneli i Murrizit nuk mund të ndërtohej sipas një kompanie daneze. U la që të bëhej riprojektimi i tunelit. Edi Rama e futi në sorqokak. Ai donte pare. Ka lidhje kryesisht me problemin e rrugës së Arbrit. Ndaj jam i bindur që Edi Rama nuk ndërton kurrë rrugën e Arbrit. Ai nuk po përfundon dot rrugën Lushnje-Berat që maksimumi kishte 6muaj punë”-tha Berisha.
Deklaratat e tij, Berisha i bëri pas një takimi që pati me kongresmenin Eliot Engel dhe ambasadorin e SHBA-së në Tiranë, Donald Lu.
