Kreu i Partisë Demokratike, Sali Berisha, ka zhvilluar për rreth 30 minuta një mbledhje me të gjithë drejtuesit politikë të qarqeve. Gazetari Enkel Xhangoli, raporton se tema kryesore e kësaj mbledhje ishte gjetja e provave për mos mbarëvajtjen e procesit zgjedhor të 11 majit. Të dhënat e secilit prej drejtuesve duhet të paraqitet në raportin e posaçëm të Partisë Demokratike, një përmbledhje kjo që sipas demokratëve do të paraqiten të gjitha shkeljet e zgjedhjeve të 11 majit.
“Ka zgjatur për rreth 30 minuta mbledhja e që zoti Berisha zhvilloi me drejtuesit politik të qarqeve. Në fokus në këtë takim të shkurtër kanë qenë pikërisht gjetjet që kanë bërë drejtuesit politik të qarqeve, me të dhëna që sipas tyre tregojnë për manipulim apo parregullsi në zgjedhjet e 11 majit. Në fakt, këto të dhëna që do të mbledhin drejtuesit politikë, por edhe vetë PD, do të përdoren për t’u vendosur tek raporti përfundimtar që po përgatit PD për ta dërguar atë më pas në çdo kancelari apo faktorin ndërkombëtar, për të treguar që zgjedhjet e 11 majit janë manipuluar dhe se qeveria nuk ka bërë zgjedhje të drejta dhe të barabarta sikurse parashikohet në ligj apo rregullore”, raporton gazetari.
Kërkesa e Berishës për drejtuesit politik të qarqeve ishte theksi tek farsa elektorale që cilëson Partia Demokratike për këto zgjedhje.
“Të gjithë drejtuesit janë porositur që retorika e tyre të jetë pikërisht farsa elektorale të 11 majit dhe çdo gjetje që ata kanë do referohet në selinë e Partisë Demokratike dhe në një kohë të dytë pasi nuk ka një afat përfundimtar se kur PD do ta ketë raportin përfundimtar, por deri në ato momente drejtuesit politik do të mbledhin të dhëna e do i reflektojnë ato në raportin përfundimtar që do të ketë PD”, shton gazetari.
Kampi blu ka bërë një draft-raport lidhur me zgjedhjet e 11 majit, të cilën e ka dërguar në disa zyra ndërkombëtare. Ajo që dihet deri më tani është se Partia Demokratike në këtë raport cilëson zgjedhje në kushte të pabarabarta, e atë që kryedemokrati cilëson si “farsë elektorale”.
