Kreu i Partisë Demokratike, Sali Berisha mori pjesë sot në ceremoninë për nderimin e katër martirëve të vrarë më 2 prill të vitit 1991 në qytetin e Shkodrës.
Gjatë fjalës së tij, Berisha tha se martirët që kanë humbur jetën në këtë masakër janë frymëzimin për qytetarët shqiptarë.
Ai tha se 11 Maji është dita që ndan diktaturën e bazuar në drogë, nga shteti i të drejtës, liritë dhe të drejtat e qytetarëve, për këtë arsye u bëri thirrje të gjithë shqiptarëve që më 11 Maj të kthejnë votën e lirisë.
“Martirët e 2 Prillit janë frymëzim i madh për çdo qytetar të sakrifikojë për lirinë dhe votën e saj. Ne nderojmë sot këtë ditë para një ngjarjeje që do të ndajë epokat sepse përsëri ne, nderojmë veprën e tyre të ndritur, sakrificën e tyre sublime në një diktaturë, e cila nuk bazohet në më ideoligjinë e ish-komitetit të partisë, por bazohet në ideoliogjinë e Dobraçit, të krimit, të terrorit. Dhe kjo është një diktaturë po aq e shëmtuar sa e para. Bazohet në ideologjinë e një bande, që kërkon të mposhtë një qytet liridashës dhe kjo bandë ka një kryebandit në krye, që quhet Edi Rama.
Ndaj dhe sot, sakrifica, heroizmi i martirëve të Shkodrës është më frymëzues se kurrë. Është thirrje për çdo qytetar të këtij qyteti të bekuar, për çdo shqiptar, të kthejmë 11 Majin në ditën e votës së lirë. Të kthejmë me 11 Maj, dritën e lirisë në Shkodër dhe mbarë Shqipërinë. 11 Maji është dita që ndan histori dhe epoka, ndan diktaturën e bazuar në drogë, nga shteti i të drejtës, liritë dhe të drejtat e qytetarëve.
Ndan varfërinë dhe mjerimin në rritje të shqiptarëve nga rruga e mirëqenies, e begatimit të pandalshëm të tyre. Ndan dëshpërimin me shpresën, ndan zhgënjimin me besimin e madh se Shkodra dhe Shqipëria do të jenë të jetueshme. Do të jenë dinjitoze për qytetarët e saj. Ndan shpopullimin, shkretimin e Shkodrës dhe Shqipërisë nga djemtë dhe vajzat, burrat dhe gratë e saj.
Nga besimi dhe kthimi i këtij besimi, nga rikthimi i tyre në Shqipëri për të ndërtuar ëndrrën shqiptare. Dhe unë u them ju, nuk ka ëndërr më të bukur se ëndrra shqiptare, nuk ka ëndërr më fisnike se ëndrra shqiptare, nuk ka ëndërr më sublime se ëndrra shqiptare. Nuk ka vend më të pasur dhe më të begatë se kjo tokë që e grabisin dhe plaçkisin. Ndaj dhe ne, më 11 Maj firmosim projektin e ëndrrës shqiptare.
Projektin e shqiptarëve jashtë varfërisë ekstreme. Projektin e Shqipërisë që prodhon në çdo skaj të saj të mira për qytetarët e saj. Projektin e Shqipërisë që begaton dhe rrit mirëqenien çdo herë e më shumë të qytetarëve të saj. Projektin e Shqipërisë që ndëshkon me forcën e ligjit krimin, korrupsionin dhe mbron të drejtat e qytetarëve. Projektin e Shqipërisë që shndërrohet në një Shqipëri superfuqi energjetike. Një Shqipëri shprese, besimi. Një Shqipëri ëndrre. Dhe ky është nderimi më i madh që u bëjmë ne martirëve të 2 Prillit që ranë për të fituar pavdekësinë me votën e lirë. Për të fituar pavdekësinë me shpirtin liridashës të çdo qytetari. Për të fituar pavdekësinë me dinjitetin njerëzor. Nder përjetë martirëve të 2 Prillit. Nder Shkodrës, Rozafës së lirisë”, tha Berisha.
