Kreu i partisë demokratike, Sali Berisha ka komentuar listën e PS, një ditë pas dorëzimit në KQZ të listave të kandidatëve për zgjedhjet e 11 majit.
Në një deklaratë për mediat, Berisha tha se në listën e mbyllur të Edi Ramës janë të gjithë ministrat që kanë dosje në SPAK.
Ai e ka quajtur listën e mbyllur të Ramës “lista e mafies”.
“Ndërkohë, shqiptarët panë listën e Skapit në krahun tjetër. Të gjithë ministrat me dosje kuintalëshe mbi shpinë u futën njëri pas tjetrit në listën e mbrojtur, për shkakun e vetëm se kanë vjedhur bashkë me Edi Ramën. Se ata që nuk kanë vjedhur bashkë me Edi Ramën, por kanë ngrënë dardha veçmas, ata morën udhët, morën urët.
Lista e mbyllur e Edi Ramës është lista e Skapistëve, e atyre që hyjnë e dalin në Skap dhe që shkojnë me paturpësinë më të madhe për t’u kërkuar votën qytetarëve për t’u mbrojtur nga Drejtësia. Pra, lista e mbyllur është lista e mafies, është lista e Skapit e Edi Ramës”, tha Berisha.
