Kryetari i Partisë Demokratike, Sali Berisha mblodhi këtë të enjte kryesinë e PD-së. Gjatë mbledhjes, Berisha akuzoi kryetarin e Bashkisë së Tiranës, Erion Veliajn se po ndërton shkolla me 3 milion euro, ndërkohë që në vendet e Europës një shkollë ndërtohet me 650 mijë euro bazuar në njësinë manuale të ndërtimit e kostove.
Po ashtu, duke iu referuar instalacionit me dru në brendësi të kryeministrisë, Berisha tha se, kryeministri Rama po e trajton Shqipërinë si çifligun e tij. Sipas tij me lekët që do përdoren për ndërtimin e këtij instalacioni mund të ndërtoheshin shkolla me standarde evropiane.
“Sot, në rast se në kryeqytetet e vendeve të BE një shkollë ndërtohet me 650 mijë euro bazuar në njësinë manuale të ndërtimit e kostove, Lali Vjedhësi ndërton shkolla me 3 milionë euro, mos më shumë..Rrugët është bërë e famshme me çmimet më të larta. Nuk ka ligj, nuk ka manual, nuk ka asgjë që mund të ndalojë Edi Ramën dhe grupin e tij nga vjedhjet e papërmbajtura. Po e trajton shqipërinë si cifligun e tij. A mundet kur një njeri për hobin e tij dhe të xhepave të tij të vendosë 4 milion euro në oborrin e brendshëm të kryeministrisë pa asnjë funksion tjetër përveç vjedhjes. Me 4 milion euro ndërtoheshin shkolla të standardit më të mirë evropian. Tani ato janë një instalacion druri”- tha Berisha./Opinion.al
