Kreu i Partisë Demokratike Sali Berisha në konferencën e përjavshme me gazetarët foli sërish për projektin për ndërtimin e Portit të Durrësit.
Gjatë fjalës së tij Berisha paralajmëroi të gjitha kompanitë që do të marrin pjesë në ndërtimin e Portit të Durrësit se do të futen në listën e zezë.
Berisha thotë se Partia Demokratike do të përdorë të gjitha format për të kundërshtuar, atë ç’ka ai e cilëson si plaçkitje të pronës publike.
“Të gjitha këto e bëjnë situatën në Shqipëri eksplozive. Qytetarët shqiptarë nuk mund të qëndrojnë duarkryq përballë këtyre akteve që kalojnë çdo imagjinatë të vjedhjes së pasurive të tyre publike. Ndaj dhe PD do përdorë të gjithë format për të kundërshtuar këtë plaçkitje të pronës publike më të çmuar që kanë sot shqiptarët. Ne, natyrisht do u prijmë të gjitha nismave për dështimin e këtij projekti. Jam këtu për të paralajmëruar se çdo kompani ndërtimi që do marrë pjesë në këtë projekt, do futet në listën e zezë. Dhe i paralajmëroj që të mos shndërrohen në shushunja për të vjedhur një pronë publike të shqiptarëve. Sepse po regjistrohen nënkontraktorë tani. Kjo që po bën Rama dhe Balluku është e pashembullt në histori”, tha Berisha./Opinion.al
