Kreu i PD, Sali Berisha ka mbledhur këtë të martë Kryesinë e PD, vetëm një ditë pas protestës së opozitës të mbajtur para parlametit.
Teksa foli për revolucionin demokrat, Berisha gjatë fjalës së tij, tha se opozita është në hapat e para të mosbindjes civile.
Kryedemokrati përjashtoi dhunën si mjet për marrjen e pushtetit, ndërsa theksoi se dhuna asgjëson PD.
“Duhet të vazhdojmë me persistencë absolute këtë revolucion. Në mënyrë kreative. Unë e di që çdo ditë do dëgjoni njerëz që ju thonë se pa dhunë, nuk përmbyset, nuk arrihet. Unë u them atyre, dhe ju do u thoni, se qëndresa është forcë. Dhuna nuk të sjell në objektivat që kërkon. Ne jemi në hapat më fillestarë të mosbindjes civile, të shfrytëzimit të potencialit të jashtëzakonshëm që ka mosbindja civile. Nuk shkojmë te forca. Sepse të shkosh te forca, do të thotë të marrësh pushtetin me forcë. Që në këtë moment, kjo forcë asgjëson veten. Por përdorim çdo formë të mosbindjes civile”-tha Berisha.
