Kryetari i PD Sali Berisha u shpreh i gatshëm për t’u ulur me Edi Ramën e për të prekur ligjin themeltar të shtetit, që kërkon minimalisht 94 vota, 11 më shumë seç Rama ka PS për të ulur nurmin e deputetëve.
“Ka dhe një mendim të kahershëm, është i 25-30 viteve më parë që vendi të bëhet me 2 dhoma. Dhoma e lartë e senatit, dhe ajo e parlamentit. Jam dakord me këtë se sado pak, po në qoftë se e ndërton senatin jo si një institucion bllokues, po si një institucion frenues, atëherë i bën një të mirë vendit. Kur një mazhorancë, senati është i dobishëm.
Shqipëria në rast se ngre një senat, pa diskutim që duhet të pakësohet numri i deputetëve. Për zvogëlimin e bashkive nuk jemi dakord. Ne kemi vendosur një kusht që kemi pranuar. Në komisionin për Zgjedhoren të jetë ODHIR, dhe në Territorialen të jetë ekspertët e Kongresit të Autoriteteve Rajonale dhe Lokale të Evropës. Nëse është problemi për të përcaktuar senatin e republikës në Kushtetutë, jam gati të ulem. Mendoj se është institucion i dobishëm. Reforma vendore nuk ka nevojë për Kushtetutë”, tha Berisha.
Kjo kërkesë, e artikuluar edhe më herët nga opozita në 2020 është kundërshtuar nga socialistët asokohe, por mund të jetë kushti për të pranuar uljen e numrit të deputetëve siç Rama ka kërkuar.
Emrat për anëtarët e Komisionit të Reformës Zgjedhore, pritet të depozitohen zyrtarisht këtë javë nga palët politike. Bashkë-kryetarët e saj me gjasë, do të jenë sërish të njëjtët, me Damian Gjiknurin tashmë të konfirmuar nga socialistët dhe Oerd Bylykbashin.
Komisioni, i ngritur zyrtarisht me 113 vota pro, do të ketë bashkëdrejtues me të drejtë vetoje, me numër të barabartë anëtarësh pozitë-opozitë dhe ekspertizë ndërkombëtare.
Karriget janë të ndara 7 për PD-në, 7 për PS si dhe nga një vend me të drejtë vote për 2 partitë e Tom Doshit dhe Agron Shehajt. Edhe partitë e tjera mund të marrin pjesë në komision, por pa të drejtë vote.
