I pyetur në lidhje me tërheqjen e opozitës nga aksioni për të bllokuar zgjedhjet, ish-kryeministri Sali Berisha tha se ky ishte një vendim shumë i mirë.
Ai pranoi se opozita bëri një tërheqje, por shtoi se në një demokraci liria ime përfundon aty ku fillon liria e tjetrit. Megjithatë ai tha se opozita bëri me sukses të gjitha përpjekjet për të demaskuar farsën elektorale dhe kjo u pa në bojkotin që ju bë atyre.
“Atë bëri mirë për mendimin tim. Aty bëri shumë mirë. Opozita bëri një tërheqje, kjo është e vërtetë, por bëri shumë mirë sepse opozita bëri përpjekjet më të jashtëzakonshme për të demaskuar farsën elektorale, thirrjes së qytetarëve për të bojkotuar iu përgjigj pasivisht, më tutje aty nuk mund të shtynte. Liria ime përfundon aty ku përfundon liria e tjetrit.” deklaroi ish-kryeministri.
Sali Berisha shtoi gjithashtu se zgjedhjet vendore të 30 Qershorit janë të dënuara me vdekje. Ai rikujtoi Konventën Europiane të të Drejtave të Njeriut për të argumentuar se procesi ishte antidemokratik. Madje ai tha se cilido që mbështet këto zgjedhje do të mbulohet nga turpi i historisë.
“Zgjedhjet janë të dënuara me vdekje, nuk ishin zgjedhje ato. Ishin një farsë. Cilido që mendon le të rikujtojë pak Konventën Europiane të të Drejtave të Njeriut për zgjedhjet, për votën. Ato vendime hedhin poshtë me përçmim si antidemokratike zgjedhjet moniste, zgjedhjet pa alternativë, pa kandidatë. Cilido që mbështet këto zgjedhje do të mbulohet nga turpi i historisë, ky është një vend i lirë. Asgjë këtë popull nuk mund ta mposhtë”, tha Berisha jashtë selisë së Partisë Demokratike pas një mbledhjeje të strukturave drejtuese të PD. /Opinion.al
