TIRANË- Ish-kryeministri Berisha mblodhi sot gazetarët për një bashkëbisedim, ku theksoi se do të flasë për ngjarjet e fundit politike por jo duke dhënë qendrimin e PD se atë e jep Basha, por qendrimin e tij personal. Ilir Meta ishte kryefjala. “Që kur u hap ky parlament ju e dini se unë i kam thënë Metës se Rama të do në burg. Vinin lajmet nga Berlini dhe Brukseli se Rama çonte aty dosjen e Metës për ta denoncuar atë. Ndaj unë i thashë Metës që atëherë si ti në këtë koalicion je skllav. Ruga e tij ishte që të thoshte që atëherë ejani më hetoni”.
Kështu deklaroi Berisha, ndërsa e ftoi Metën që të fuste në rend dite dhe të votonte draftin e PD-së për hetim ndërkombëtar të CEZ.
Aferën e CEZ ai e kanalizoi diku tjetër. Tek marrëveshja e Qeverisë Rama me këtë kompani, që sipas tij i kushtoi Shqipërisë 600 mln euro. Berisha tha se deklarata e djeshme e zotit Kopac konfirmoi pazaret e kulisave të bëra nga Qeveria në kurriz te shqiptareve. “Kopac konfirmoi, pazarin e kulisave të bërë në kurriz të shqiptarëve. Deklarata e tij se, gjysmë ore pas firmosjes së marrëveshjes më CEZ-in, qeveria çeke tërhoqi veton, tregon qartë se Edi Rama bashkërendoi me X-in pazarin për CEZ-in. Kurrë një Qeveri, e një vendi anëtar të BE, nuk mund të përdorë veton për ta blerë me 600 milion euro heqjen e saj. Kjo është jashtë çdo imagjinate. Çështja e statusit nuk është çështje tregtare, është vendim i mirëfilltë politik, kryekëput politik i vendeve anëtare dhe Komisionit Europian”, tha Berisha.
