Ish-kryeministri, Sali Berisha, duhet të paraqitet në SPAK këtë të hënë në orën 10:00. Por çfarë ndodh nëse ai nuk shkon dhe nuk dërgon një shkak të arsyeshëm për dy prokurorët e çështjes?
Mësohet se në këtë rast prokurorët kanë në dorë që t’i dërgojnë një shkresë ku e njoftojnë se në rast se nuk paraqitet të hënën e tretë të muajit do të ketë ashpërsim të masës së sigurisë.
Duke qenë se Berisha është në një moshë të thyer, një masë sigurimi që mund të aplikohet në këtë rast është arresti në shtëpi.
Kjo mund të ndodhë në rast se nga ana e Berishës nuk pranohet të zbatohet vendimi i Gjykatës së Posaçme Kundër korrupsionit dhe Krimit të organizuar të dhënë nga gjyqtarja Irena Gjoka vetëm disa ditë më parë.
Ajo i caktoi Berishës detyrim për t’u paraqitur në Policinë Gjyqësore dhe gjithashtu urdhëroi që të mos largohet jashtë territorit të Shqipërisë.
Kujtojmë se ish-kryeministri refuzoi të marrë pjesë në gjyq, me pretendimin se nuk mund të shkelë Kushtetutën.
Berisha përmend nenin 73 pika 2 ku theksohet se deputetit nuk mund të arrestohet apo t’i hiqet liria, pa autorizimin e parlamentit.
