Ish-kryeministri Sali Berisha thotë se djali i nënkryetares së Bashkisë Shijak, Robert Domi, është një prej të arrestuarve të një operacioni policor, ku u sekuestrua 1 kg kokainë.
Teksa citon burime nga “qytetari digjital”, në postimin e tij në rrjetet sociale, Berisha shkruan se vetë kryetari i Bashkisë Shijak, Elton Arbana, ka qenë në polici duke negociuar lirimin e Domit.
Ndërkohë, policia njoftoi më herët se Domi dhe dy personat e tjerë të arrestuar furnizonin me kokainë disa rrjete shpërndarësish. Përveç 30-vjeçarit, në pranga përfunduan edhe 24-vjeçari A.D dhe 27-vjeçari G.M.
“Në rrugën “Vangjush Furrxhi”, shërbimet e Policisë kanë lokalizuar automjetin me drejtues shtetasin G. M. dhe pasagjerë shtetasit A. D. dhe R. D. Gjatë kontrollit në automjet është gjetur një pako me lëndë të dyshuar narkotike të llojit kokainë, me peshë 1 kg e 52 gramë. Nga verifikimet e kryera ka rezultuar se këta shtetas, në bashkëpunim me njëri-tjetrin, siguronin lëndë të dyshuar narkotike të llojit kokainë dhe më pas disa rrjete shpërndarësish, në rrugën “Myslym Shyri”, në Rrugën e Durrësit dhe në zonën e 21-Dhjetorit. Në cilësinë e provës materiale u sekuestruan 1 kg e 52 gramë lëndë e dyshuar narkotike kokainë, 4 aparate celulare, 1400 euro dhe 78 900 lekë”, tha policia.
