Ish-kryeministri Sali Berisha thotë se anëtarësia e PD nuk ka besim tek Lulzim Basha, duke thënë se ai tashmë është një lider i thyer.
Berisha tha se qytetarët mund ta qortojnë atë që ka mbështetur Bashën, teksa tha se pas mbështetjes kreu i PD nisi të mbivlerësonte veten e tij.
“Ndjej shumë keqardhje për dhimbjen e krijuar në anëtarësinë e PD, që nuk e ka imagjinuar ndonjëherë. Shumica e anëtarësisë nuk e besonte si lider Lulzim Bashën. Nuk janë vetëm pollet, por edhe ndjenjat. Por përsëri, unë dy gjëra kam bërë në fushatë dhe tani njerëzit mund të më qortojnë. Kam bërë luftë me mediat që e zhvlerësonin në masë ekstreme. Jam përpjekur të rreshtoj meritat e tij, tjetër punë që ai kaloi në supervlerësim për veten e tij. Media dhe kundërshtari e zhvlerësonte tërësisht dhe unë nuk pajtohesha me këtë. Problemi është se media i vinte kryq dhe unë e vlerësoja, por këtë e bëja jo për personin e tij, por për demokratët. Doja që të mos e asgjësonin atë. U kam thënë grupit të këshilltarëve se ai është ‘broken leader’, një lider i thyer dhe se duhet bërë gjithçka për ta ngjitur. Nëse ai nuk ngjitet, atëherë duhet të kaloni në platformën tjetër, të Fransua Miteran “unë jam zotëria normal”. duke thënë se ai është normal dhe të gjenden rrugë me çdo mënyrë për të rritur partinë,” tha Berisha./ Opinion.al
