Themeluesi i Partisë Demokratike Sali Berisha ka hedhur akuza të forta ndaj kryetarit Lulzim Basha, të cilin e cilësoi autor të 4 disfatave.
Në një takim me gratë e Partisë Demokratike, bëri me dije se tashmë janë mbledhur rreth 5 mijë firma për mbajtjen e Kuvendit Kombëtar, ndërsa pohoi se në 11 Dhjetor Bashën do e shndërrojnë në një shoqatë.
“Ne jemi përsëri në një betejë. Kemi një peng, një njeri peng, i cili nuk njeh as siç po dëshmon çdo ditë asnjë normë morale e as ligjore. Nuk jap dorëheqjen thotë se nuk parashikon statuti, po dorëheqja është akt normal i njeriut të shoqëruar dhe të flasësh në këtë mënyrë tregon se nuk di se cila është përgjegjësia morale e njeriut. Je autor i 4 disfatave njëra pas tjetrës. Jam i sigurt, se ti je i përgatitur me këtë moral që ke edhe për 18 të tjera po të la njeri, por ne do të shndërrojmë ty në një shoqatë e asgjë tjetër në 11 dhjetor. Sot janë firmosur rreth 5.000 formularë. Theksoj këtu, se në Kuvend janë të mirëpritur e të ftuar çdo delegat e delegate që nuk kanë firmosur formularin. Pse ecëm ne në këtë mënyrë? Ne mund ta deklaronim këtë pasi mblodhëm 2 mijë firma, por ne vendosëm ta deklarojmë pasi të jemi shumica. Kjo shumicë do të jetë tolerante, jo itolerante. Përkundrazi, edhe ata që nuk mendojnë si ne janë të ftuar, edhe ata që mendojnë kundër nesh janë të ftuar. Garantoj pakicën se do të respektohen çdo kërkesë e saj që është në kuadrin statutor”, tha Berisha duke ju bërë thirrje të gjithëve të mblidhen në 11 Dhjetor. Ai e cilësoi si antikuvend datën e thirrur nga Basha më 18 Dhjetor./Opinion.al
