Në një takim me demokratët në Shkodër, ish-Kryeministri Sali Berisha iu bëri thirrje demokratëve që mbështesin Lulzim Bashën që të heqin dorë, pasi sipas tij Basha është turp i historisë.
Berisha iu drejtua edhe deputetëve duke iu thënë që të mos e mbështesin Bashën ndërsa theksoi se Bashën e “pret vrima e miut nga ky revolucion që nuk ka të ndalur”.
“Nuk ka ndodhur dhe nuk ndodhin kurrë në një vend të lirë zhvillime të tilla. A mundet një shtet të servirë për opozitë njeriun që e rrethon me banditë dhe policë, njeriun me të cilin ndan aferat korruptive, njeriun me të cilin i mbyll dosje krimi? Kjo s’mund të ndodhë në asnjë vend tjetër përveçse në Shqipëri. Iu drejtohem atyre demokratëve që akoma në mënyrën më të pabesueshme dëshmojnë mbështetjen më të vogël për “Lulzim Bravën”. Hiqni dorë prej tij, hiqni dorë se ai është turpi i dheut, është turpi i historisë. U them deputetëve të Shkodrës, bashkohuni një minutë e më parë me qytetin tuaj. Bashkohuni me sakrificën vuajtjen, qëndresën, heroizimin, vizionin e atyre që ju votuan ju. Ndahuni nga “Lulzim Brava” se atë e pret vrima e miut nga ky revolucion që nuk ka të ndalur. Askush nuk ka të drejtë. Askush nuk ka të drejtë të luajë me plurazmin politik në Shqipëri”, tha Berisha./Opinion.al
