Në një dalje për mediat këtë të hënë, kreu i PD, Sali Berisha ka hedhur akuza të forta ndaj ambasadores së SHBA në Shqipëri, Yuri Kim. Berisha tha se në llojin e saj Kim është një McGonigal.
Ndër të tjera Berisha i bëri thirrje FBI që të hetojë qëndrimet e ambasadores amerikane në lidhje me këtë çështje.
“Kodi i heshtjes po zbatohet edhe nga guvernatorja, e cila nuk ka lënë gjë pa komentuar.
Tani për një ngjarje që ka tronditur thellë botën, nuk shqipëron një fjalë të vetme.
Si është e mundur kjo? Çfarë interesash përfaqëson guvernatorja?
A mund të shpjegojë kush? A ka shqiptar që nuk pret një reagim të saj për këtë ngjarje?
Në llojin e saj, guvernatorja është një McGonigal, ndaj të cilës janë shumë akuza për të gjitha format e korrupsionit.
Nëse McGonigal nisi me manipulimet me dosjen ruse, guvernatorja vazhdoi veprën e saj me shpifje, me sulme, duke dëshmuar se nuk ka asnjë parim, asnjë vlerë.
Duke rendur nga studio në studio, nga zyra në zyrë, me qëllimin e vetëm të shkatërronte opozitën.
Nuk është kjo që e bën të aplikojë kodin e heshtjes. Ndaj u bëj thirrje FBI, agjencive të tjera të SHBA, të hetojnë se cilat kanë qenë qëndrimet e saj ndaj McGonigal. Ka informuar ajo vendin e vet për takimet që ai ka pasur, për veprimtarinë e tij, për vizitat e shpeshta në Shqipëri?
Ka informuar ajo për Deripaskën në Shqipëri, për kompanitë e tij që fryheshin si shushunja në Shqipëri, paçka se prej katër vitesh ishin nën sanksione të rrepta të SHBA?
Ka pasur ajo dreka e darka me ekipin Rama-McGonigal.
Këto dhe gjëra të tjera janë të rëndësishme për autoritetet e vendit mik për t’i shkuar deri në fund kësaj çështje”-tha Berisha.
