Kreu i PD, Sali Berisha ka deklaruar se akti për Teatrin Kombëtar është dhunim flagrant i vendimit të Gjykatës Kushtetuese.
Në fjalën e tij para Grupit Parlamentar të PD, Berisha u shpreh se Shqipëria është vendi i vetëm në botë, ku një vendim i Gjykatës Kushtetuese rrëzohet me një vendim të qeverisë.
“Nga ky akt kalohet në një akt madhor, dhunimin flagrant të vendimit të Kushtetueses. Kjo është një sfidë e hapur, jo vetëm për Aleancën për Mbrojtjen e Teatrit, por për opozitën në radhë të parë.
Opozitës i thuhet se nuk njohim norma, nuk njohim standarde, por jemi të gatshëm të ndërmarrim çdo akt, në kundërshtim të hapur me një vendim të Gjykatës Kushtetuese.
Gjykata Kushtetuese ndalon procedimin e mëtejshëm në atë truall, ia kthen atë qeverisë. Ky është vendi i vetëm ku vendimet e Kushtetueses rrëzohen me vendime të banditëve qeveritarë.
Ky është vendi i vetëm në botë ku një vendim i Gjykatës Kushtetuese rrëzohet me një vendim të qeverisë”-tha Berisha.
