Deputeti Ilir Beqja ka propozuar një projekt-ligj që qeveria të falë gjobat që AKU i ka vendosur operatorëve që merren me prodhimin apo tregtimin e produkteve ushqimore.
Sipas tij gjobat e AKU janë në përputhje me përcaktimet ligjore por operatorët që merren me produktet ushqimore për konsumatorin nuk kanë qenë të informuar për licencat që duheshin për ushtrimin e aktivitetit.
Me këtë qëndrim ish-ministri i Shëndetësisë ka dalë hapur në kundërshtim me nismën e qeverisë për ashpërsimin e Kodit Penal për ata që cenojnë sigurinë ushqimore të konsumatorëve shqiptarë duke paralajmëruar dënime deri në 15 vjet burg.
Në relacionin e projektligjit të propozuar nga Beqja “për faljen e gjobave të vendosura nga Autoriteti Kombëtar i Ushqimit ndaj operatorëve të biznesit ushqimor”, thuhet se qëllimi i projektligjit është lehtësimi i barrës së operatorëve ekonomikë që kanë aktivitet kryesor prodhimin, përpunimin dhe shpërndarjen me shumicë të ushqimeve si dhe shitjen me shumicë të prodhimeve shtazore, të cilët janë gjobitur nga AKU-ja pasi nuk kanë qenë të licencuar për ushtrimin e aktivitetit në momentin e kryerjes së kontrollit.
Ish-deputeti i Partisë Demokratike Bardh Spahia e ka konsideruar këtë qëndrim të deputetit socialist Beqja një “teatër makabër e i pafytyrë”
“Më tallje se kaq me njerëzit e shëndetin e tyre nuk ka! Nuk bëhen dot me qytetarin edhe kur e premtojnë me gojën e vetë Edi Ramës, jo! Grykësia është më e fortë edhe se cipa e fytyrës kur premton diçka me zë e figurë. Me kulisa të tilla tregojnë se as nuk u bëhet vonë për shëndetin e qytetarëve. I shohin veç si kontigjent votash në fushatë!” shkruan Spahia. /Opinion.al
