Urdhri për shkarkimin e një numri të caktuar të punonjësve të shëndetësisë mbërriti edhe në Shkodër e Elbasan. Lajm që sipas mjekëve, s’mund të ngjallë veçse neveri, urrejtje, përbuzje dhe mosbindje civile ndaj një vendimi të pabazë, që u heq bukën e gojës jo pak, por 90 punonjësve të shëndetësisë në spitalin rajonal të Shkodrës. Vetëm një ditë pas publikimit të shkresës zyrtare të ministrit të Shëndetësisë, i cili i kërkon drejtoreshës së spitalit rajonal të Shkodrës shkarkimin e 90 punonjësve, me të drejtë këta të fundit kërkojnë t’i argumentohet arsyeja e këtij vendimi. Si në çdo qytet tjetër të vendit, ku ka mbërritur më parë e njëjta shkresë, edhe në Shkodër, mjekë, infermierë dhe sanitarë protestuan në ambientet e jashtme të spitalit, të vendosur për të kundërshtuar urdhrin e ministrit Beqaj, theksojnë se refuzojnë t’i binden. Bluzat e bardha të mbështetura edhe nga bashkimi i sindikatave të pavarura kanë dalë në protestë duke kundërshtuar këtë vendim, që sipas tyre është absurd dhe që bie në kundërshtim edhe me Kodin e Punës.
Pjesa më e madhe e sanitareve, në pavijonin që preket më shumë nga reduktimi i stafit, ku parashikohen përkatësisht 65 largime nga detyra thonë se kanë mbi 20 vite që punojnë në këtë institucion, për këtë arsye nuk do të largohen pa marrë një përgjigje nga ministri i Shëndetësisë. “Jetojnë 6 veta vetëm me rrogën time. Gjithë natën kam qenë e sëmurë me tension, rrezik me u paralizu prej idhnimit”, tregon një prej sanitareve. Një tjetër kolege e saj, njësoj e shqetësuar për “hallin” që i ka rënë mbi supe shprehet: “S’e di nëse e kemi pas një vërejtje dhe me na heq tani pas 25 vjetëve. Vjen ai tjetri prej rruge dhe hyn, ne kemi lënë 25 vjet eshtrat këtu”. Ndërsa kryeinfermieri i kirurgjisë, njëherësh kreu i Sindikatës së Shëndetësisë, Paolo Kaceri, e quan absurd këtë vendim dhe i kërkon ministrit Beqaj që përpara se të bëjë të tilla reforma, t’i sigurojë detergjentë spitalit dhe medikamente që janë domosdoshmëri për jetën e pacientit.
“Do kemi bllokim të punës nga reparti i kirurgjisë për arsye se po hiqen struktura të mirëformuara dhe të konsoliduara prej shumë vitesh, po hiqen dhe hedhen në rrugë të madhe”, deklaroi kryeinfermieri Kaceri. Në mbrojtje të së njëjtës kauzë, kryetari i Bashkimit të Sindikatave të Pavarura të Shqipërisë në Shkodër, Albert Tukaj, i pranishëm në protestën e djeshme, theksoi se “sektori i shëndetësisë në Shkodër nuk është pronë private për të bërë ministri ç’a t’i thotë koka e tij, por është sektor publik i rëndësisë së veçantë”. Zyrtarisht mësohet se shkresa e mbërritur në zyrën e drejtoreshës së Spitalit të Shkodrës kërkon rankim të punonjësve dhe firmosjen e shkarkimit për 90 prej tyre.
Situatë e ngjashme tensioni është paraqitur edhe në qytetin e Elbasanit, ku dhjetëra punonjës të Spitalit Rajonal të Elbasanit kanë protestuar dje paradite kundër vendimit për largimin e tyre nga puna. Më shumë se 80 infermierë, sanitarë dhe punonjës të shërbimeve të tjera në Spitalin Rajonal të Elbasanit janë larguar nga detyra, po me urdhër të ministrit të Shëndetësisë. Punonjësit e prekur nga ky vendim thonë se kanë mbi 20 vite punë dhe se largimi i tyre është i padrejtë, pasi, siç pretendojnë ata, kjo po bëhet me qëllim zëvendësimin e tyre me punonjës të tjerë të rinj, militantë të Partisë Socialiste. E kontaktuar nga “Top Channel”, drejtoresha e spitalit të Elbasanit, tha se për largimet nga puna është parë niveli i arsimimit dhe performanca e çdo punonjësi. Sipas saj, asnjë nga pretendimet e punonjësve për largime të padrejta nuk qëndron. Por, pavarësisht këtij shpjegimi, të larguarit nga puna kanë deklaruar se do të vijojnë protestat deri në gjetjen e një zgjidhjeje.
Të tjerë precedentë të ngjashëm regjistrohen edhe në spitalet e tjera rajonale të vendit, ku veçohet rasti i spitalit të Rrëshenit, ku drejtori Pjetër Ndoji paraqiti dorëheqjen në vend që të shkarkonte nga detyra punonjësit, me të cilët pohoi se ka punuar një jetë, ngjarje që u pasua me atë që ndodhi në spitalin e Burrelit, ku drejtori, Ylli Berberi, gjithashtu dha dorëheqjen në shenjë mosbindje ndaj reformës së ndërmarrë nga Beqaj.
