Një dëshmi e sotme e Nuredin Dumanit në gjykatë ka bërë bujë për mënyrën se si u lirua nga paraburgimi në vitin 2014, me një akt-ekspertimi që e përcaktonte Dumanin në atë kohë me probleme të lindura në zemër që kishte 3 muaj jetë dhe nuk mund të qëndronte në qeli.
Në dëshminë e tij, Dumani tha se për këtë akt-ekspertim fals kishte paguar 40 mijë Euro.
Gazetari Spartak Koka, i ftuar në emisionin Opinion në Tv Klan, ka reaguar ashpër ndaj mjekëve që kanë përpiluar këtë akt-ekspertimi, pasi me daljen nga qelia në vitin 2014, Nuredin Dumani u kthye në një vrasës me pagesës duke shkaktuar disa viktima.
“Të shkojmë te emrat konkretë të personave të cilët kanë marrë 40 mijë Euro, kanë përpiluar këtë akt-ekspertimi. E kam ndjekur rastin edhe me Gjykatën e Tiranës. E kam kërkuar informacionin e plotë, më jep fashikullin gjyqësor për vendimin e vitit 2014 dhe e klasifikonte si sekret Gjykata e Tiranës. Më thërret gjyqtarja për mediat më thotë për çfarë e do këtë të Nuredin Dumanit. I thashë, e dua sepse Nuredin Dumani me këtë akt-ekspertimi është liruar dhe pasi është liruar, ka kryer vrasje. Jo vetëm që nuk vdiq, por vdiq të tjerët, me dhjetra”.
Gazetari Koka thotë se ironia në akt-ekspertimin shëndetësor të Dumanit është fakti që evidentohej në gjendje të rëndë shëndetësore, teksa nga ana tjetër vetë i pandehuri ka kryer vrasje të shumta.
“E di kush është ironia? E bën të pamundur, thotë, të rrijë në kushte paraburgimi dhe ky del në këtë gjendje të rëndë shëndetësore, për të rregulluar aritminë duhet të bënte vetëm vrasje, vrasje njëra pas tjetrës që të mbante të stabilizuar çështjet e zemrës”.
