Rishfaqen problemet për Benfikën.
Sipas medias portugeze, drejtuesit e skuadrës luzitane që njihet ndryshe si ‘shqiponjat’ e Lisbonës, janë akuzuar së bashku me ish këshilltarin ligjor, Pedro Gonsalves e dy funksionarë gjyqësorë për tentativë të regullimit të rezultateve të disa prej ndeshjeve të kampionatit në Portugali. Një histori kjo që është shfaqur prej kohësh dhe që është pasuruar me një kapitull të ri.
Sipas ‘O Jornal Economico’ kanë dalë në dritë disa emaile që vërtetojnë se klubi i kryeqytetit portugez u ka ofruar arbitrave shërbime prostitutash dhe pagesën e dhomave të hotelit të tyre.
Kjo akuzë e publikuar nuk e ka lënë indiferentë skuadrën e Benfikës që ka reaguar nëpërmjet komunikatave për shtyp duke i mohuar me forcë akuzat e publikuara.
Kjo histori e njohur në Portugali me emrin ‘E-Toupeira’ ka nisur prej një muaji.
Akuzat e Prokurorisë në drejtim të klubit janë për korrupsion pasiv, favorizime personale, shkelje e sekretit të drejtësisë dhe informacione false.
Sipas organit të akuzës, funksionarët e Benfikës të përfshirë në këtë skandal i kanë dhënë Pedro Gonsalves informacione të rezervuara në lidhje me disa procedime në lidhje me klubet rivale, informacione që u siguruan nëpërmjet korrupsionit dhe shkëmbimit të favoreve, ndërkohë që hetimet vazhdojnë.
Top Channel
