“Çdo deputeti që voton sot ligjin e importit të mbetjeve duhet t’i shkruhet emrin në kazanin e plehrave. Sepse ka ardhur koha, që çdo kazan të ketë një emër. Emrin e deputetit që e voton sot këtë ligj”. Kështu shprehet Ben Blushi në një shkrim të publikuar në Lapsi.al
Sipas Blushit, me këtë akt, morali politik i këtij grupi të ndotur keqbërësish merr fund. “Rilindja po voton ligjin e PD për importin e mbetjeve, një ligj të cilin e pati shfuqizuar vetë në vitin 2013”, vijon ai.
“Nga nesër, të dyja bashkë, Rilindja dhe PD, do të nxjerrin kokën nga
kazanët e plehrave dhe do të na buzëqeshin. Natyrisht nuk na mbetet
tjetër vetëm të kalojmë aty dhe t’ua hedhim plehrat në kokë për t’i
mbuluar”, shkruan deputeti socialist.
“Nëse duhet të them pse erdhi ky ligj sërish në parlament, pasi ai u hoq në vitin 2013, natyrisht e kam një përgjigje: ky ligj është i Blerë.
Dikush ka paguar për ta sjellë në parlament. Pa asnjë dyshim. Rilindja
nuk e fsheh më se e ka shitur ligjin në treg. Eshtë krijuar me sa duket
nën kujdesin e veçante të Partive Tregtare të Rilindjes edhe një treg i
ri: tregu i ligjeve”, shkruan Blushi.
“Kjo pra është çështja. Ligjin nuk e ka sjellë në Kuvend interesi publik,
por interesi privat. Interesi publik kërkon pastërti, interesi privat kërkon para. Qeveria u rreshtua me të dytën. Eshte kaq e thjeshtë, kaq e poshtër dhe kaq kriminale. Prandaj pyetja mbetet prej shumë kohësh: Kush e qeveris Shqipërinë? E qeveris një grusht biznesmenësh, të cilët dje kishin kapur PD dhe sot kanë kapur Rilindjen”.
“Pra rotacioni i pushtetit nuk vlen më në Shqipëri. Shqiptarët votojnë dhe gjithmonë nga kutia e votimit del një grup biznesmenësh, pronë e të cilëve janë edhe dy partitë e mëdha, PD dhe Rilindja dhe, një pak më e vogël, e cila bën transportin e bizneseve nga njëra të tjetra. Mes dy brigjeve që i ndot i njëjti moçal, ka gjithmonë nevojë për një kazan lundrues”, shkruan Blushi.
