Deputeti i larguar nga PS-ja, Ben Blushi ka organizuar ditën e sotme një sërë takimesh me bazën. Pas kthimit nga Përmeti, Blushi është ndalur edhe në qytetin e Fierit, ku ka zhvilluar disa takime me qytetarë dhe mbështetës.
“Projekti ynë jo rreth një njeriu, por një ideje. Do të ketë më shumë liri dhe barazi brenda një partie. Partitë e vjetra kanë mbështetur vetëm të pasurit, kanabizimin dhe nuk i kanë vënë fre emigracionit. Ne do bashkojmë më shumë njerëz të zakonshëm për t’u dhënë liri dhe pse jo të ndryshojmë hartën politike në vend”, ka thënë Blushi.
Nuk ka munguar edhe një sqarim për largimin e tij nga Partia Socialiste dhe për deklaratat e kryeministrit Edi Rama në emisionin “Studio e Hapur”.
“Ika nga rilindja, pasi i vetmi sukses që pati ishte vetëm nënshtrimi. Nuk dua të komentoj deklaratat, cdo ditë përpiqem të dezinfektohem nga rilindja”, ka thënë Blushi përpara mbështetësve të tij në këtë qytet.
