“I zhgënjyer dhe i indinjuar” nga qëndrimi i qeverisë shqiptare për sa i përket çështjes së Fredi Belerit, tha kryeministri grek Kyriakos Mitsotakis nga Brukseli.
Gjatë konferencës për shtyp, pas përfundimit të Samitit të premten, kryeministri i dërgoi një mesazh të ashpër Tiranës dhe qeverisë Rama, ndërsa tha se më parë ka njoftuar homologët e tij për rastin e kryebashkiakut të sapozgjedhur të Himarës.
“Pata rastin të informoj homologët e mi për atë që po ndodh sot në Shqipëri me rastin e kryebashkiakut të zgjedhur të Himarës dhe të shpreh zhgënjimin, indinjatën time për faktin se një kryetar i zgjedhur në fakt arrestohet dy ditë pas zgjedhjes së tij dhe ai ndodhet në burg, për ne me dispozita të dyshimta procedurale,” tha ai.
Kryeministri grek e cilëson rastin Beleri si “goditje për shtetin e së drejtës dhe për përpjekjet e Shqipërisë për të respektuar acquis evropiane”, ndërsa thotë se kjo do të jetë një element i vlerësimit grek për rrugën evropiane të Shqipërisë
“Unë e konsideroj si një goditje për shtetin e së drejtës dhe për përpjekjet e Shqipërisë për të respektuar acquis evropiane. Pres që kjo çështje të zgjidhet shumë shpejt. Një çështje shumë e rëndësishme për ne dhe zgjidhja ose moszgjidhja e saj, uroj që të jetë e para e theksoj, të jetë një element i vlerësimit grek të rrugës evropiane të Shqipërisë, që fillon tani dhe është një rrugë e gjatë”, theksoi ai duke vazhduar:
“Respektimi i rregullave bazë të shtetit ligjor është një kusht i panegociueshëm për çdo vend që parashikon të bëhet anëtar i familjes evropiane. Dua të besoj se ky mesazh është kuptuar plotësisht edhe në Shqipëri.”
Duke iu drejtuar qeverisë Rama, kryeministri sqaroi se çështja Beleri nuk është çështje që Greqia “e lë të kalojë kështu”, duke lënë të kuptohet se do të ketë vazhdimësi në reagimin e Athinës për të ndryshuar qëndrimin e Tiranës.
“Unë e respektoj absolutisht ndarjen e pushteteve, dua të jem shumë i qartë për këtë, por nga ana tjetër nuk është një çështje që do ta lë të kalojë kështu, pa pasur një reagim nga Greqia. Dhe reagimi i parë u shpreh në Këshillin Evropian me konferencën e kolegëve të mi se çfarë saktësisht po ndodh sot me këtë rast”, përfundoi kryeministri./Opinion.al
