Ministria e Punëve të Jashtme të Greqisë ka reaguar lidhur me vendimin e Gjykatës së Posaçme të Apelit për lënien në burg të Fredi Belerit.
Në deklaratën e dhënë thuhet se ky vendim “nuk përbën një trajtim të drejtë të një përfaqësuesi të zgjedhur të pushtetit vendor”, pasi “është i vetmi në paraburgim në gjithsej 31 ankesa për kundërvajtje zgjedhore”.
Ndër të tjera thuhet se kjo çështje ka qenë edhe temë diskutimi gjatë ditës së sotme në takimin në Oslo mes ministres së Jashtme të Shqipërisë, Olta Xhaçka dhe homologut të saj grek.
Konkretisht në deklaratë thuhet:
“Refuzimi i sotëm i ankesës së kryetarit të zgjedhur të Himarës, Fredi Beleri, kundër vazhdimit të paraburgimit të tij, nuk rezulton të jetë në përputhje me dispozitat e shtetit të së drejtës, ndërkohë që nuk përbën trajtim të drejtë të një përfaqësuesi të zgjedhur të vetëqeverisjes vendore, pasi siç del nga Njoftimi i Prokurorisë Speciale të Shqipërisë, është i vetmi paraburgim në gjithsej 31 ankesa për krime zgjedhore.
Vendimi gjithashtu ngre pikëpyetje për ekzistencën e arsyeve politike në mbajtjen në paraburgim, pasi shkakton pengesa esenciale në marrjen e detyrës si kryebashkiak.
Vazhdimi i paraburgimit të Belerit ka qenë objekti i bisedës së sotme me ministrin e Jashtëm Vassilis Kaskarelis me homologen e tij shqiptare Olta Xhaçka në Oslo, në margjinat e takimit joformal ministror të ministrave të jashtëm të NATO-s.
Ministria e Punëve të Jashtme e vlerëson çështjen në prioritetet e saj dhe, përtej dimensionit dypalësh të çështjes, do të vazhdojë të informojë dhe ndërgjegjësojë komunitetin ndërkombëtar dhe në veçanti partnerët europianë, pasi Shqipëria është vend kandidat për anëtarësim në BE”.
