Ministri i Jashtëm grek, Nikos Dendias ka komentuar sërish çështjen e arrestimit të Fredi Belerit.
I ftuar në emisionin “Morning Greece” në televizionin Ant1, duke folur për rezultatin e zgjedhjeve të së dielës, Dendias ka komentuar edhe zgjatjen e masës së sigurisë për Fredi Belerin, për të cilin GJKKO vendosi ta lërë në burg deri në përfundim të hetimeve.
Për çështjen e ndalimit të Belerit në burgjet shqiptare, ai tha se zgjatja e paraburgimit bie ndesh me perceptimin eurpian të shtetit të së drejtës.
Pas takimit me Xhaçkën ai bën me dije se BE nuk duhet të tolërojë shkeljet e shtetit ligjor nga një vend në Europë.
“Ministria e Jashtme ka dhënë një njoftim zyrtar. Zgjatja e paraburgimit, bie ndesh me ndjenjën e drejtësisë publike dhe perceptimin europian të shtetit të së drejtës. Por ka edhe gjëra që nuk thuhen në publik. Takova edhe homologen time shqiptare dhe i thashë gjithçka që shumëkush kupton se duhet t’i thosha. Ne nuk duam të sjellim askënd në pozitë të vështirë, por nga ana tjetër jo vetëm qeveria greke, por edhe BE nuk do të tolerojë shkeljet e shtetit ligjor nga një vend në Europë”, u shpreh ministri grek.
Menjëherë pas vendimit të GJKKO ditën e djeshme për të lënë në burg Belerin, erdhi një reagim nga faqja zyrtare e Ministrisë së Jashtme ku thuhej se ishte një goditje për drejtësinë publike dhe perceptimin evropian për shtetin e së drejtës.
“Zgjatja e paraburgimit të Fredi Belerit, tashmë i zgjedhur kryetar i Bashkisë Himarë, godet sensin e drejtësisë të publikut dhe perceptimin evropian të shtetit të së drejtës” shkruante Ministria. /Opinion.al
