Një intervistë e dhënë për gazetën greke “Prothotema” e kandidatit të “Bashkë Fitojmë” për Himarën, Fredi Beleri, ka shkaktuar reagime në opinionin publik.
Politikanë dhe qytetarë, kanë shprehur indinjatë lidhur me termin e përdorur “helenizimi i Himarës”.
I pyetur nga Klan News, nëse mbante ende të njëjtin qëndrim, Beleri ka mohuar të ketë bërë një cilësim të tillë, duke theksuar se fraza e tij është përkthyer gabim nga greqishtja.
“E vërteta e deklaratës është deformuar nga stafi i PS, nga montazhiera e PS. Është ndryshuar përkthimi nga greqishtja në shqip, nuk është i njëjti kuptim. Nuk kam thënë asnjëherë për helenizimin e Himarës, kam thënë tekstualisht nga greqishtja që në Himarë jetojmë si grekë ne minoritarët, këtu e shumë shekuj. Problemet kryesore të Himarës nuk janë as helenizimi dhe as shqiptarizimi, problemet kryesore janë vjedhja masive e pronës, shpopullimi i Himarës edhe pse është një nga bashkitë më të pasura.”
Ai iu përgjigj dhe akuzave të kryeministri Edi Rama, që e cilësoi Belerin si “shëmbëlltyra e qarqeve të errëta greke”.
“Deklarata ime ishte në një nga gazetat prestigjoze dhe unë jam anëtar i partisë ‘Demokracia e Re’, parti konservatore e djathtë dhe qendrës në Greqi këtu e 25 vite. Të gjithë e njohin nëse kam qenë në qarqe ekstremiste ose kam qenë ndonjë herë asaj që i themi harku demokratik. Zoti Rama përballë humbjes në zgjedhjen e tij të gabuar me Goron mundohet të gjejë justifikim për të thënë broçkulla patriotike. Unë mendoj se patriotizmi modern nuk janë flamujt që duan ti ngrenë sa më lart, patriotizmi modern është të kesh besim te qytetarët, të respektosh djersën e tyre, taksat e tyre, të mos vjedhësh e të mos bësh korrupsion. Goro dhe Rama duhet të përgjigjen te KLSH, bashkia e Himarës ka 1 milionë euro taksa të pambledhura dhe ka 87 tendera korruptive. Për mua këto janë problemet e qytetarëve dhe këto duhet të ishin diskutuar në fushatë, gjë që nuk u bë.”
Për mundësinë e nisjes së një hetimi ndaj tij, Beleri tha se ka respektuar çdo ligj të Shqipërisë dhe se ka besim te sistemi i drejtësisë./ Klan News
