Ministria e Jashtme greke ka reaguar pas vendimit të gjykatës së Vlorës për të lënë në burg kandidatin e koalicionit “Bashkë Fitojmë” për bashkinë e Himarës, Fredi Beleri. Përmes një deklarate Ministria e Jashtme Greke e cilëson si skandaloz vendimin e sotëm teksa thotë se arrestimi i një kandidati për Kryetar Bashkie dy ditë para zgjedhjeve nuk përbën shtet ligjor.
“Vendimi i sotëm i gjykatës së Vlorës, nëse provat nuk janë të pakundërshtueshme, është skandaloz. Arrestimi i një kandidati për Kryetar Bashkie dy ditë para zgjedhjeve nuk përbën shtet ligjor. Vendimi për ndalimin e kandidatit për Kryetar Bashkie sjell një ndryshim të plotë të rregullave të barazisë në zgjedhjet bashkiake në Himarë, qendra më e rëndësishme e pakicës kombëtare greke në Shqipëri”-thuhet ne deklaratë.
Ndër të tjera në deklaratë thuhet se vendimi si ky i sotmi tregon se Shqipëria nuk po ndjek rrugën e shtetit të së drejtës, e as atë europiane.
“Një vendim i tillë do të ndikojë edhe në marrëdhëniet e Bashkimit Europian me Shqipërinë, pasi kusht i kësaj rruge europiane është respektimi i rregullave europiane dhe parimeve të shtetit të së drejtës nga vendet kandidate. Vendime si ky i sotmi që shkelin parimet e mësipërme do të thotë se në praktikë Shqipëria nuk po ndjek rrugën europiane”-përfundon deklarata.
Kujtojmë se ditën e sotme gjykata la në burg Fredi Belerin, kandidatin e koalicionit “Bashkë Fitojmë” për zgjedhjet e 14 Majit në Himarë, ndërsa dosja në ngarkim të tij i kaloi për kompetencë SPAK.
