Athina po përshkallëzon reagimet e saj kundër burgosjes së kryebashkiakut të zgjedhur të Himarës, Fredi Beleri, shkruan media greke Protothema.
Sipas informacioneve, sot në COREPER (Këshilli i Përfaqësuesve të Përhershëm të Shteteve Anëtare të BE-së) Greqia ka paraqitur një rezervë në lidhje me ecurinë e procesit të anëtarësimit të Shqipërisë, duke bërë të qartë se nuk do të japë pëlqimin për ecurinë e negociatave të anëtarësimit të Shqipërisë nëse nuk do të ketë zhvillime pozitive në lidhje me marrjen e detyrave të kryetarit të zgjedhur të Bashkisë Himarë, Fredi Beleri.
Në tetor, Greqia nuk ka dhënë pëlqimin për dërgimin e letrës së “27” për hapjen e një sërë Kapitujsh në pikën e fillimit të negociatave të anëtarësimit të Shqipërisë me BE.
Më 4 dhjetor, gjykata e Tiranës do të shqyrtojë, pas shumë muajsh pengesë, kërkesën e Fredi Belerit për t’i dhënë leje për të bërë betimin ndërkohë që do të zhvillohet gjykimi normal për akuzën e blerjes së votës ndaj tij.
“Gjyqi i cili ka dështuar pas pranimit të dëshmitarit kryesor të akuzës se ka pasur lidhje me policinë dhe është paguar nga fonde sekrete, pritet të vazhdojë deri më 5 dhjetor në Tiranë”-shkruan Protothema.
Athina me deklaratat e ministrit të Jashtëm Giorgos Gerapetritis dhe me misionin në Tiranë të ministrit të shtetit Stavros Papastavros i cili vizitoi Fredi Belerin në burgjet e Durrësit, ka dërguar një mesazh të qartë se do të përdorë çdo mjet presioni që ka në dispozicion, për të rrëzuar këtë ndjekje penale ndaj kryebashkiakut të zgjedhur të Himarës.
