Kreu i PBDNJ-së Vangjel Dule ka folur sot për çështjen e kryebashkiakut të zgjedhur të Himarës, Fredi Beleri i cili ndodhet në burg pasi akuzohet për korrupsion zgjedhor.
Në një deklaratë për mediat ku ka denoncuar problemet me Censusin e popullsisë, Dulaj tha se nuk ka asnjë afat ligjor që e kufizon Belerin të kryejë betimin.
I pyetur për afatet ligjore, Dule theksoi se Beleri do ta drejtojë bashkinë deri në vitin 2027 si të gjithë kryebashkiakët e tjerë.
“Do ju thosha që nuk ka asnjë afat ligjor që e kufizon z.Beleri të kryejë betimin që nga momenti që ka shprehur dëshirën, që në momentin e parë për t’iu përgjigjur ligjit dhe Kushtetutës.
Për rrjedhojë që nga momenti që z.Beleri për asnjë çast nuk ka refuzuar që të bëjë betimin, nuk ka asnjë dispozitë ligjore që e çon procedurën në përfundim mandati. Z. Beleri është kryetari i zgjedhur i Bashkisë dhe si i tillë do ta drejtojë atë dhe mandati i tij përfundon si i gjithë kryebashkiakëve të tjerë në vitin 2027”, deklaroi Dule./Opinion.al
